Мақалалар

Қазіргі таңда жиналыстарды, конференцияларды, жүздесулерді және сабақтарды онлайн түрде өткізу заман талабына сай десек артық айтпаймыз. Қолданылу мүмкіндігінің жоғарылығына байланысты көптеген онлайн платформалы қосымшалар қолданушылардың оң бағасын алып жатқандығы баршаға аян. Өзінің қолданылу мүмкіндігінің кеңдігімен танылған қосымшалардың бірі – Google Meet.

Онлайн вебинар, семинар, тренингтер өткізу үшін өте қолайлы әрі тиімді қосымша. Латын әліпбиін насихаттау және оны көпшілікке үйрету үшін бұл қосымша қолжетімді. Ондағы жиналыс жазбалары Google Drive жүйесінде үнемі сақталып отырады. Яғни, сіз өткізілген жиналыстың жазбаларын әрдайым бақылап, көре аласыз. Жиналыстың өткізілу уақыты 1 сағатқа дейін жалғасады. Қатысушыларды қабылдау мүмкіндігі 100-ден 200 адамға дейін. Бір ескерерлігі, 2021 жылдың 21 наурызына дейін тегін шексіз байланыс орнату мүмкіндігі бар. Сонымен қатар Google Meet бейнеконференциялардан бөлек мәтіндік хабарламалармен алмасуға мүмкіндік береді. Google Meet қай жерде болмасаңыз да, сапалы бейнеқоңырау шалу үшін желінің жылдамдығын реттеп отырады. Қиын жағдайда да сурет пен дыбысты сапалы ұстап тұруға жағдай жасайды.

Google Meet – бұл Google-дің бейне конференция қызметі. Мұндағы «Meet» сөзі кездесу деген ұғымды береді. Бұл – жеке адамдар үшін де, кәсіпкерлер үшін де аудио және бейнеқоңыраулар арқылы кездесудің тамаша шешімі. Ол Google Hangouts-та дүниеге келді, бірақ кейбір ерекше белгілері бар. Google Meet қауіпсіз бейне кездесуді тез және оңай орнатады. Оған қосылу үшін кез келген заманауи веб-шолғышты (веб-браузер) қолдану қажет немесе қолданбаны орнату керек. Google корпоративті деңгейдегі бейнеконференцияны барлығына қолжетімді етеді. Енді Google-де аккаунты бар кез келген адам бейне кездесу өткізе алады. Компаниялар, білім беру мекемелері және басқа да ұйымдар 2020 жылдың бірінші мамырынан бастап 100-ге дейінгі қолданушылармен кездесулер өткізуге және 100000 көрерменге дейін хабар таратуға мүмкіндік беретін жетілдірілген қажеттіліктерді қолдана алады.

Ал енді Google Meet-тің қолданылу ретіне тоқталайық:

1) G-mail-ге кіру және «Кездесуді бастау» дегенді батырманы басу керек. Егер сізде веб-камера қосылған болса, ол анықталады, веб-камера болмаған жағдайда онсыз жұмыс істеуіңізді сұрайтын хабарлама пайда болады.

2) Бейнекамераны бастау үшін «Қосылу» батырмасын басыңыз. Микрофонды пайдалану үшін браузерге рұқсат беру керек. Егер сізде бірнеше микрофон болса, ашылмалы мәзірден біреуін таңдаңыз. Жиналыс жасаған кезде пайдаланушыларға сіздің жиналысыңызға қосылуға мүмкіндік беретін сілтеме жасалады. Сонымен қатар достар тізімінен контактілерді «Қосу» батырмасын басу арқылы тікелей қосуға болады.

3) Пайдаланушылар тізімін таңдап, шақыру жіберу үшін «Қосу» батырмасын басу керек. Жиналысқа қатысушылар саны экранның жоғарғы оң жақ бұрышында, сөйлесу параметрлері мен ағымдағы уақыттың жанында көрсетіледі.

4) Жиналыс басталғаннан кейін бейне сілтеме алу үшін экранның төменгі жағындағы жиналыс туралы ақпаратты басу қажет. Құралдар тақтасында жиналысты басқаруға арналған батырмалар да бар. Микрофонды қосатын, өшіретін, жиналыстан ажыратуға, камераны қосуға және өшіруге бағытталған. Осы реттіліктерді орындасаңыз, жоспарланған бейнекамераны еш кедергісіз бастай аласыз.

          Google Meet жиналысына қосылу үшін:

G-mail-ден жиналысқа «Жиналысқа өту» түймесін басып, содан кейін кодты енгізу арқылы қосылады немесе сіз Google Meet бетіне өтіп, кодты енгізе аласыз. Содан кейін «Қосылу» батырмасын басу қажет.

Ескерту: Онлайн кездесуге қосылу үшін міндетті түрде Google аккаунт болу қажет. Конференция әкімшісі пайдаланушыны жиналысқа қосу туралы өтінішін алады. Конференция басталғаннан кейін, оң жақ жоғарғы бұрышта адам саны көрсетіледі.

Қорыта айтқанда, кез келген жағдайда байланыс орнатуға мүмкіндік беретін Google Meet қосымшасы барлық салада қолжетімді. Жоғарыда айтылғандай, аталған қосымша онлайн түрде кез келген іс-шараны жоғары дәрежеде өткізуге бағытталған бірден-бір жүйе.

Қарағанды облысының тілдерді

жөніндегі басқармасы жанындағы

 Ресурстық тіл орталығының оқытушысы

Айғаным Жетімек