Жаңалықтар

Бүгін Қарағанды облысының тілдерді дамыту жөніндегі басқармасының ұйымдастыруымен Қасым үйінде БАҚ өкілдері арасында бұқаралық ақпарат құралдарындағы тіл мәдениетін дамыту, кәсіби мамандардың іс-тәжірибесімен бөлісіп, әдістемелік көмек көрсету мақсатында «Медиа-мәдениет және тіл» тақырыбында облыстық семинар өтті.

Іс-шараға газет пен телеарна өкілдері, жас журналистер, редакторлар, корректорлар және жоғары оқу орындарының студенттері қатысты.

Семинарда Е.А. Бөкетов атындағы Қарағанды зерттеу университетінің профессоры, филология ғылымдарының докторы – Асанов Қойлыбай Дәулетханұлы «Сөз (тіл) мәдениеті және журналистика» тақырыбында; әлеуметтік ғылымдар магистрі, медиа-зерттеуші, «Astana aqshamy» республикалық қоғамдық-саяси газетінде шеф-редакторы – Төлен Тілеубай «Тіл – адам санасына ықпал ету құралы тақырыбында; «Ortalyq Qazaqstan» газетінің Бас редакторы, Қазақстан Журналистер одағы сыйлығының лауреаты – Мұсабеков Ерсін Кәрібайұлы «Мерзімді басылымдардағы тіл тазалығы» жайында сөз қозғады.

Спикерлер тақырып аясында сөйлеу және жазу мәдениеті, әлеуметтік желідегі этика мәселесі, мәтіннің стилистикасы, әлеуметтік желідегі тілдік агрессия тәрізді өзекті мәселелерге тоқталды.

Медиа-мәдениетті қалыптастыруда журналистердің үлесі басым болғандықтан, алдағы уақытта осы бағыттағы жұмыстар жалғасын тапса деген ұсыныстар айтылды.

Іс-шара соңында семинар материалдары жинағы таратылып, қатысушыларға сертификат табысталды.