Жаңалықтар

Қыркүйектің 7-11 аралығында Қарағанды қаласының Мәдениет және тілдерді дамыту бөлімі мен Ресурстық тіл орталығының бірлесе ұйымдастыруымен «Латын графикасында оқу және жазу дағдысын қалыптастыру» тақырыбында  Қарағанды қаласының орталықтандырылған кітапханалар жүйесінің мамандарына арнап онлайн курс өткізілді. Курсты Қарағанды облысының Тілдерді дамыту жөніндегі басқармасы Ресурстық тіл орталығының оқытушысы Камила Ерсінқызы жүргізді.

Курста латын әліпбиіне көшудің маңыздылығы нақтылы мысалдармен түсіндіріліп, осы төңіректегі өзекті мәселелер ортаға салынды. Мамандар тек дәріс тыңдап қана қоймай, практикалық бағыттағы әртүрлі  тапсырмаларды орындап, диктант жазды. Тақырыпқа сай ойындар ұйымдастырылды.

Оқытушы мен тыңдаушылар арасында кері байланыс орнатылып, кітапханашы мамандар латын графикасына байланысты өз ұсыныс-пікірлерін білдіруде белсенділік танытты. Болашақта әліпбидің жаңа нұсқасы қабылданғанда әліпби құрамын тез танып, оқып, жазып кету үшін осындай курстардың маңызы зор болмақ.